CircularPreb

Zergatik proiektu hau?

Gero eta ezagunagoak dira dietan, hesteetako floran, sistema immunologikoan... prebiotikoak sartzeak dakartzan onurak, batez ere adineko pertsonen kasuan. Horregatik, prebiotikoak balio erantsi handiko produktuak dira, eta horien ondorio onuragarriak dosi txiki samarrak aplikatuz nabaritzen dira.

Elikagaien sektoreak azpiproduktu ugari ekoizten ditu, eta horien balorizazioa hobetu daiteke. Horietako batzuk, sagar patxa (sagardotegietako azpiproduktua) eta esne gazura (gaztandegietako azpiproduktua) esaterako, fruktooligosakaridoen (FOS) eta galaktooligosakaridoen (GOS) iturri interesgarriak izan daitezkeela ikusi dugu.

Enpresa kontzientziatuak garenez, lehentasunezkoa da biztanleriaren osasunarekin eta zahartzearekin lotutako ikerketaren eremuan laguntzea, garapen jasangarrirako bokazio argia duten proiektu eta negozio ereduen bidez, eta ekonomia zirkularraren esparruan.

Produktu prebiotikoak bezalako balio erantsi handiko produktu berrien bila elikagaien hondakinak balorizatzeko Circularpreb proiektua aukera ona izan da ildo horretan aurrera egiteko.

Nola egin dugu?

Enpresen eta teknologia zentroen arteko lankidetza funtsezkoa izan da; prebiotikoak erauzteko hainbat metodo probatu ditugu, prebiotikoen eduki nahiko altuak dituzten estraktuak lortzeko.

Ondoren, estraktuak lehortzeko hainbat proba egin ditugu, hauts bihurtzeko, Gipuzkoan garatutako lehortze teknologia erabiliz, Pulse Spray Drying izenekoa. Proba asko egin ondoren, hori arrakastaz egin ahal izan da, baina zailtasun bat gainditu behar izan da: erauzitako prebiotikoak azukreak edo oligosakaridoak dira, eta, substantzia mota horiek guztiek bezala, portaera itsaskorra dute, daukaten ura kendu ondoren. Beraz, ezin dira erabili, fluidifikatzen dituen aditiboren bat gehitu ezean, kasu honetan maltodextrina izan den bezala.

Proiektuaren planteamendua zero hondakin sortzea izan da, sagar patxaren kasuan frogatu den bezala. Izan ere, prebiotikoak (produktu nagusia) erauzi ondoren geratzen den gainerako zuntza ere lehortu egin da, eta, horren ondorioz, «sagar hautsezko elikagai zuntza» sortu da, beste elikagai batzuetan osagai gisa erabiltzeko modukoa.

Gainera, garatutako erauzketa eta lehortze prozesuen ingeniaritza eta azterketa ekonomikoa egin dira, prozesu horien lehen ezarpen industrialean pentsatuz eta etorkizunean mota horretako biofindegi bat garatzeko benetako aukerak aztertuz.

Zer ekarpen egin du proiektuak?

Lankidetza ezinbesteko alderdia da balorizazio proiektuetan. Hainbat eremutan adituak diren enpresek zentro teknologikoekin batera egindako lanari esker, aurrera egin ahal izan da hain proiektu konplexuan.

CircularPreb proiektuan frogatu da bai sagar patxa bai esne gazura prebiotikoen iturri egokiak direla, fruktooligosakaridoak patxaren kasuan, eta galaktooligosakaridoak gazuraren kasuan. Bi produktu horiek hainbat elikagai matrizetan edo beste aplikazio batzuetan sar daitezkeela, horien jarduera prebiotikoa areagotuz.

Webgunea: klikatu hemen